1) atha kho bhagavā āyasmantaṃ ānandaṃ āmantesi: 'siyā kho pan' ānanda tumhākaṃ evam assa: "atīta-satthukaṃ pāvacanaṃ n'atthi no satthā" ti| na kho pan' etaṃ ānanda evaṃ daṭṭhabbaṃ| yo vo ānanda mayā dhammo ca vinayo ca desito paññatto so vo mam' acayena satthā|
2) yathā kho pan' ānanda etarahi bhikkhū aññam-aññaṃ āvuso-vādena samudācaranti na vo mam' accayena evaṃ samudācaritabbaṃ| theratarena ānanda bhikkhunā navakataro bhikkhu nāmena vā gottena vā āvuso-vādena vā samudācaritabbo navakatarena bhikkhunā therataro bhikkhu "bhante" ti vā "āyasmā" ti vā samudācaritabbo|
3) ākaṅkhamāno ānanda saṃgho mam' accayena khuddānukhuddakāni sikkhāpadāni samūhantu|
4) channassa ānanda bhikkhuno mam' accayena brahma-daṇḍo kātabbo' ti| 'katamo pana bhante brahma-daṇḍo' ti? 'channo ānanda bhikkhu yaṃ iccheyya taṃ vadeyya so bhikkhūhi n'eva vattabbo na ovaditabbo na anusāsitabbo' ti|
5) atha kho bhagavā bhikkhū āmantesi: 'siyā kho pana bhikkhave eka-bhikkhussa pi kaṅkhā vā vimati vā buddhe vā dhamme vā saṃghe vā magge vā paṭipadāya vā pucchatha bhikkhave| mā pacchā vippaṭisārino ahuvattha: "sammukhī-bhūto no satthā ahosi na mayaṃ sakkhimha bhagavantaṃ sammukhā paṭipucchitun" ti|' evaṃ vutte te bhikkhū tuṇhī ahesuṃ|dutiyaṃ pi kho bhagavā bhikkhū āmantesi: 'siyā kho pana bhikkhave eka-bhikkhussa pi kaṅkhā vā vimati vā buddhe vā dhamme vā saṃghe vā magge vā paṭipadāya vā pucchatha bhikkhave| mā pacchā vippaṭisārino ahuvattha: "sammukhī-bhūto no satthā ahosi na mayaṃ sakkhimha bhagavantaṃ sammukhā paṭipucchitun" ti|' dutiyaṃ pi te bhikkhū tuṇhī ahesuṃ|tatiyaṃ pi kho bhagavā bhikkhū āmantesi: 'siyā kho pana bhikkhave eka-bhikkhussa pi kaṅkhā vā vimati vā buddhe vā dhamme vā saṃghe vā magge vā paṭipadāya vā pucchatha bhikkhave| mā pacchā vippaṭisārino ahuvattha: "sammukhī-bhūto no satthā ahosi na mayaṃ sakkhimha bhagavantaṃ sammukhā paṭipucchitun" ti|' tatiyaṃ pi te bhikkhū tuṇhī ahesuṃ|atha kho bhagavā bhikkhū āmantesi: 'siyā kho pana bhikkhave satthu-gāravena pi na puccheyyātha| sahāyako pi bhikkhave sahāyakassa ārocetūti|' evaṃ vutte te bhikkhū tuṇhī ahesuṃ|
6) atha kho āyasmā ānando bhagavantaṃ etad avoca: 'acchariyaṃ bhante abbhutaṃ bhante| evaṃ pasanno ahaṃ bhante imasmiṃ bhikkhu-saṃghe n'atthi eka-bhikkhussa pi kaṅkhā vā vimati vā buddhe vā dhamme vā saṃghe vā magge vā paṭipadāya vā' ti| 'pasādā kho tvaṃ ānanda vadesi| ñāṇaṃ eva h'ettha ānanda tathāgatassa: "ṅ'atthi imasmiṃ bhikkhu-saṃghe eka-bhikkhussa pi kaṅkhā vā vimati vā buddhe vā dhamme vā saṃghe vā magge vā paṭipadāya vā| imesaṃ hi ānanda pañcannaṃ bhikkhu-satānaṃ yo pacchimako bhikkhu so sotāpanno avinipāta-dhammo niyato sambodhi-parāyano' ti|
7) atha kho bhagavā bhikkhū āmantesi: 'handa dāni bhikkhave āmantayāmi vo: "vaya-dhammā saṃkhārā appamādena sampādethāti|' ayaṃ tathāgatassa pacchimā vācā|
8) atha kho bhagavā paṭhamajjhānaṃ samāpajji| paṭhamajjhānā vuṭṭhahitvā dutiyajjhānaṃ samāpajji| dutiyajjhānā vuṭṭhahitvā tatiyajjhānaṃ samāpajji| tatiyajjhānā vuṭṭhahitvā catutthajjhānaṃ samāpajji| catutthajjhānā vuṭṭhahitvā ākāsānañcāyatanaṃ samāpajji| ākāsānañcāyatanā-samāpattiyā vuṭṭhahitvā viññāṇañcāyatanaṃ samāpajji| viññāṇañcāyatana-samāpattiyā vuṭṭhahitvā ākiñcaññāyatanaṃ samāpajji| ākiñcaññāyatana-samāpattiyā vuṭṭhahitvā nevasaññā-nāsaññāyatanaṃ samāpajji| nevasaññā-nāsaññāyatana-samāpattiyā vuṭṭhahitvā saññā-vedayita-nirodhaṃ samāpajji| atha kho āyasmā ānando āyasmantaṃ anuruddhaṃ etad avoca: 'parinibbuto bhante anuruddha bhagavā' ti| 'na āvuso ānanda bhagavā parinibbuto saññā-vedayita-nirodhaṃ samāpanno' ti|
9) atha kho bhagavā saññā-vedayita-nirodha-samāpattiyā vuṭṭhahitvā nevasaññā-nāsaññāyatanaṃ samāpajji| nevasaññā-nāsaññāyatana- samāpattiyā vuṭṭhahitvā ākiñcaññāyatanaṃ samāpajji| ākiñcaññāyatana- samāpattiyā vuṭṭhahitvā viññāṇañcāyatanaṃ samāpajji| viññāṇañcāyatana- samāpattiyā vuṭṭhahitvā ākāsānañcāyatanaṃ samāpajji| ākāsānañcāyatana- samāpattiyā vuṭṭhahitvā catutthajjhānaṃ samāpajji| catutthajjhānā vuṭṭhahitvā tatiyajjhānaṃ samāpajji| tatiyajjhānā vuṭṭhahitvā dutiyajjhānaṃ samāpajji| dutiyajjhānā vuṭṭhahitvā paṭhamajjhānaṃ samāpajji| paṭhamajjhānā vuṭṭhahitvā dutiyajjhānaṃ samāpajji| dutiyajjhānā vuṭṭhahitvā tatiyajjhānaṃ samāpajji| tatiyajjhānā vuṭṭhahitvā catutthajjhānaṃ samāpajji| catutthajjhānā vuṭṭhahitvā samanantarā bhagavā parinibbāyi|
10) parinibbute bhagavati saha parinibbānā mahā-bhūmicālo ahosi bhiṃsanako lomahaṃso deva-dundubhiyo ca phaliṃsu| parinibbute bhagavati saha parinibbānā brahmā sahampati imaṃ gāthaṃ abbhāsi: 'sabbe 'va nikkhipissanti bhūtā loke samussayaṃ, yathā etādiso satthā loke appaṭipuggalo tathāgato balappatto sambuddho parinibbuto' ti|parinibbute bhagavati saha parinibbānā sakko devānam indo imaṃ gāthaṃ abbhāsi: 'aniccā vata saṃkhārā uppāda-vaya-dhammino, uppajjitvā nirujjhanti tesaṃ vūpasamo sukho' ti|
| Previous |