11) 'cha bhikkhave aparihāniye dhamme desessāmi taṃ suṇātha sādhukaṃ manasikarotha bhāsissāmīti|' 'evaṃ bhante' ti kho te bhikkhū bhagavato paccassosuṃ| bhagavā etad avoca: 'yāvakīvañ ca bhikkhave bhikkhū mettaṃ kāya-kammaṃ paccupaṭṭhāpessanti sabrahmacārīsu āvī c'eva raho ca vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave bhikkhū mettaṃ vacī-kammaṃ paccupaṭṭhāpessanti sabrahmacārīsu āvī c'eva raho ca vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave bhikkhū mettaṃ mano-kammaṃ paccupaṭṭhāpessanti sabrahmacārīsu āvī c'eva raho ca vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave bhikkhū ye te lābhā dhammikā dhammaḷaddhā antamaso patta-pariyāpanna-mattam pi tathārūpehi lābhehi appaṭivibhatta-bhogī bhavissanti sīlavantehi sabrahmacārīhi sādhāraṇa- bhogī vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave bhikkhū yāni tāni sīlāni akhaṇḍāni acchiddāni asabalāni akammāsāni bhujissāni viññū-pasatthāni aparāmaṭṭhāni samādhi-saṃvattanikāni tathārūpesu sīlesu sīla-sāmañña-gatā viharissanti sabrahmacārīhi āvī c'eva raho ca vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave bhikkhū yā 'yaṃ diṭṭhi ariyā niyyānikā niyyāti takkarassa sammā-dukkhakkhayāya tathārūpāya diṭṭhiyā diṭṭhi-sāmañña-gatā viharissanti sabrahmacārīhi āvī c'eva raho ca vuddhi yeva bhikkhave bhikkhūnaṃ pāṭikaṅkhā no parihāni| yāvakīvañ ca bhikkhave ime cha aparihāniyā dhammā bhikkhūsu ṭhassanti imesu ca chasu aparihāniyesu dhammesu bhikkhū sandissanti vuddhi yeva bhikkhave bhikkhūnaṃ pāṭikaṅkhā no parihānīti|'
12) tatra sudaṃ bhagavā rājagahe viharanto gijjhakūṭe pabbate etad eva bahulaṃ bhikhūnaṃ dhammiṃ kathaṃ karoti: iti sīlaṃ iti samādhi iti paññā sīla-paribhāvito samādhi mahapphalo hoti mahānisaṃso samādhi-paribhāvitā paññā mahapphalā hoti mahānisaṃsā paññā-paribhāvitaṃ cittaṃ sammad eva āsavehi vimuccati seyyathīdaṃ kāmāsavā bhavāsavā diṭṭhāsavā avijjāsavā ti|
13) atha kho bhagavā rājagahe yathābhirantaṃ viharitvā āyasmantaṃ ānandaṃ āmantesi: 'āyām' ānanda yena ambalaṭṭhikā ten' upasaṃkamissāmāti|' 'evaṃ bhante' ti kho āyasmā ānando bhagavato paccassosi| atha kho bhagavā mahatā bhikkhu-saṃghena saddhiṃ yena ambalaṭṭhikā tad avasari|
14) tatra sudaṃ bhagavā ambalaṭṭhikāyaṃ viharati rājāgārake| tatra pi sudaṃ bhagavā ambalaṭṭhikāyaṃ viharanto rājāgārake etad eva bahulaṃ bhikhūnaṃ dhammiṃ kathaṃ karoti: iti sīlaṃ iti samādhi iti paññā sīla-paribhāvito samādhi mahapphalo hoti mahānisaṃso samādhi-paribhāvitā paññā mahapphalā hoti mahānisaṃsā paññā-paribhāvitaṃ cittaṃ sammad eva āsavehi vimuccati seyyathīdaṃ kāmāsavā bhavāsavā diṭṭhāsavā avijjāsavā ti|
15) atha kho bhagavā ambalaṭṭhikāyaṃ yathābhirantaṃ viharitvā āyasmantaṃ ānandaṃ āmantesi: 'āyām' ānanda yena nāḷandā ten' upasaṃkamissāmāti|' 'evaṃ bhante' ti kho āyasmā ānando bhagavato paccassosi| atha kho bhagavā mahatā bhikkhu-saṃghena saddhiṃ yena nāḷandā tad avasari| tatra sudaṃ bhagavā nāḷandāyaṃ viharati pāvārikambavane|
16) atha kho āyasmā sāriputto yena bhagavā ten' upasaṃkami upasaṃkamitvā bhagavantaṃ abhivādetvā ekamantaṃ nisīdi| ekamantaṃ nisinno kho āyasmā sāriputto bhagavantaṃ etad avoca: 'evaṃ-pasanno ahaṃ bhante bhagavati na cāhu na ca bhavissati na c' etarahi vijjati añño samaṇo vā brāhmaṇo vā bhagavatā bhiyyo 'bhiññataro yadidaṃ sambodhiyan' ti| 'uḷārā kho te ayaṃ sāriputta āsabhī vācā bhāsitā ekaṃso gahito sīha-nādo nadito: "evaṃ-pasanno ahaṃ bhante bhagavati na cāhu na ca bhavissati na c' etarahi vijjati añño samaṇo vā brāhmaṇo vā bhagavatā bhiyyo 'bhiññataro yadidaṃ sambodhiyan" ti| kin nu sāriputta ye te ahesuṃ atītaṃ addhānaṃ arahanto sammā-sambuddhā sabbe te bhagavanto cetasā ceto paricca viditā "evaṃ-sīlā te bhagavanto ahesuṃ iti pi evaṃ-dhammā evaṃ-paññā evaṃ-vihārī evaṃ-vimuttā te bhagavanto ahesuṃ iti pīti?" ' 'no h' etaṃ bhante|' 'kiṃ pana sāriputta ye te bhavissanti anāgataṃ addhānaṃ arahanto sammā-sambuddhā sabbe te bhagavanto cetasā ceto paricca viditā "evaṃ-sīlā te bhagavanto bhavissanti iti pi evaṃ-dhammā evaṃ-paññā evaṃ-vihārī evaṃ-vimuttā te bhagavanto bhavissanti iti pīti?" ' 'no h' etaṃ bhante|' 'kiṃ pana sāriputta ahaṃ te etarahi arahaṃ sammā-sambuddho cetasā ceto paricca vidito "evaṃ-sīlo bhagavā iti pi evaṃ-dhammo evaṃ-pañño evaṃ-vihārī evaṃ-vimutto bhagavā iti pīti?" ' 'no h' etaṃ bhante|' 'etth' eva hi te sāriputta atītānāgata-paccuppannesu arahantesu sammā-sambuddhesu ceto-pariya-ñāṇaṃ n'atthi| atha kiñ carahi te ayaṃ sāriputta uḷārā āsabhī vācā bhāsitā ekaṃso gahito sīha-nādo nadito "evaṃ-pasanno ahaṃ bhante bhagavati na cāhu na ca bhavissati na c' etarahi vijjati añño samaṇo vā brāhmaṇo vā bhagavatā bhiyyo 'bhiññataro yadidaṃ sambodhiyan" ti?'
17) 'na kho me bhante atītānāgata-paccuppannesu arahantesu sammā-sambuddhesu ceto-pariya-ñāṇaṃ atthi| api ca dhammanvayo vidito| seyyathā pi bhante rañño paccantimaṃ nagaraṃ daḷhuddāpaṃ daḷha-pākāra-toraṇaṃ eka-dvāraṃ tatr' assa dovāriko paṇḍito viyatto medhāvī aññātānaṃ nivāretā ñātānaṃ pavesetā| so tassa nagarassa samantā anupariyāya pathaṃ anukkamamāno na passeyya pākāra-sandhiṃ vā pākāra-vivaraṃ vā antamaso biḷāra-nissakkana-mattam pi| tassa evam assa ye kho keci oḷārikā pāṇā imaṃ nagaraṃ pavisanti vā nikkhamanti vā sabbe te iminā va dvāreṇa pavisanti vā nikkhamanti vā ti| evam eva kho me bhante dhammanvayo vidito| ye te bhante ahesuṃ atītam addhānaṃ arahanto sammā-sambuddhā sabbe te bhagavanto pañca nīvaraṇe pahāya cetaso upakkilese paññāya dubbalīkaraṇe catusu satipaṭṭhānesu supatiṭṭhita-cittā satta bojjhaṅge yathābhūtaṃ bhāvetvā anuttaraṃ sammā-sambodhiṃ abhisambujjhiṃsu| ye pi te bhante bhavissanti anāgataṃ addhānaṃ arahanto sammā-sambuddhā sabbe te bhagavanto pañca nīvaraṇe pahāya cetaso upakkilese paññāya dubbalīkaraṇe catusu satipaṭṭhānesu supatiṭṭhita-cittā satta bojjhaṅge yathābhūtaṃ bhāvetvā anuttaraṃ sammā-sambodhiṃ abhisambujjhissanti| bhagavā pi bhante etarahi arahaṃ sammā-sambuddho pañca nīvaraṇe pahāya cetaso upakkilese paññāya dubbalīkaraṇe catusu satipaṭṭhānesu supatiṭṭhita-cittā satta bojjhaṅge yathābhūtaṃ bhāvetvā anuttaraṃ sammā-sambodhiṃ abhisambuddho' ti|
| Previous |