24) assosi kho rājā māgadho ajātasattu vedehiputto: 'bhagavā kira kusinārāyaṃ parinibbuto' ti| atha kho rājā māgadho ajātasattu vedehiputto kosinārakānaṃ mallānaṃ dūtaṃ pāhesi: 'bhagavā pi khattiyo ahaṃ pi khattiyo| aham pi arahāmi bhagavato sarīrānaṃ bhāgaṃ aham pi bhagavato sarīrānaṃ thūpañ ca mahañ ca karissāmīti|' assosuṃ kho vesālikā licchavī: 'bhagavā kira kusinārāyaṃ parinibbuto' ti| atha kho vesālikā licchavī kosinārakānaṃ mallānaṃ dūtaṃ pāhesuṃ: 'bhagavā pi khattiyo mayaṃ pi khattiyā| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|' assosuṃ kho kāpilavatthavā sakyā: 'bhagavā kira kusinārāyaṃ parinibbuto' ti| atha kho kāpilavatthavā sakyā kosinārakānaṃ mallānaṃ dūtaṃ pāhesuṃ: 'bhagavā amhākaṃ ñāti-seṭṭho| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|' assosuṃ kho allakappakā bulayo: 'bhagavā kira kusinārāyaṃ parinibbuto' ti| atha kho allakappakā bulayo kosinārakānaṃ mallānaṃ dūtaṃ pāhesuṃ: 'bhagavā pi khattiyo mayaṃ pi khattiyā| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|' assosuṃ kho rāmagāmakā koliyā: 'bhagavā kira kusinārāyaṃ parinibbuto' ti| atha kho rāmagāmakā koliyā kosinārakānaṃ mallānaṃ dūtaṃ pāhesuṃ: 'bhagavā pi khattiyo mayaṃ pi khattiyā| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|' assosi kho veṭhadīpako brāhmaṇo: 'bhagavā kira kusinārāyaṃ parinibbuto' ti| atha kho veṭhadīpako brāhmaṇo kosinārakānaṃ mallānaṃ dūtaṃ pāhesi: 'bhagavā pi khattiyo aham asmi brāhmaṇo| aham pi arahāmi bhagavato sarīrānaṃ bhāgaṃ aham pi bhagavato sarīrānaṃ thūpañ ca mahañ ca karissāmīti|' assosuṃ kho pāveyyakā mallā: 'bhagavā kira kusinārāyaṃ parinibbuto' ti| atha kho pāveyyakā mallā kosinārakānaṃ mallānaṃ dūtaṃ pāhesuṃ: 'bhagavā pi khattiyo mayaṃ pi khattiyā| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|'
25) evaṃ vutte kosinārakā mallā te saṃghe gaṇe etad avocuṃ: 'bhagavā amhākaṃ gāma-kkhette parinibbuto| na mayaṃ dassāma bhagavato sarīrānaṃ bhāgan' ti| evaṃ vutte doṇo brāhmaṇo te saṃghe gaṇe etad avoca: suṇantu bhonto mama eka-vākyaṃ| amhākaṃ buddho ahu khanti-vādo| na hi sādhu yaṃ uttama-puggalassa sarīra-bhaṅge siya sampahāro| sabbe 'va bhonto sahitā samaggā sammodamānā karom' aṭṭha bhāge, vitthārikā hontu disāsu thūpā bahujjano cakkhumato pasanno' ti|'tena hi brāhmaṇa tvaṃ yeva bhagavato sarīrāni aṭṭhadhā samaṃ suvibhattaṃ vibhajāhīti|' 'evaṃ bho' ti kho doṇo brāhmaṇo tesaṃ saṃghānaṃ gaṇānaṃ paṭissutvā bhagavato sarīrāni aṭṭhadhā samaṃ suvibhattaṃ vibhajitvā te saṃghe gaṇe etad avoca: 'imaṃ me bhonto kumbhaṃ dadantu aham pi kumbhassa thūpañ ca mahañ ca karissāmīti|' adaṃsu kho te doṇassa brāhmaṇassa kumbhaṃ|
26) assosuṃ kho pipphalivaniyā moriyā: 'bhagavā kira kusinārāyaṃ parinibbuto' ti| atha kho pipphalivaniyā moriyā kosinārakānaṃ mallānaṃ dūtaṃ pāhesuṃ: 'bhagavā pi khattiyo mayaṃ pi khattiyā| mayam pi arahāma bhagavato sarīrānaṃ bhāgaṃ mayam pi bhagavato sarīrānaṃ thūpañ ca mahañ ca karissāmāti|' 'n'atthi bhagavato sarīrānaṃ bhāgo vibhattāni bhagavato sarīrāni ito aṅgāraṃ harathāti|' te tato aṅgāraṃ hariṃsu|
27) atha kho rājā māgadho ajātasattu vedehiputto rājagahe bhagavato sarīrānaṃ thūpañ ca mahañ ca akāsi| vesālikā pi licchavī vesāliyaṃ bhagavato sarīrānaṃ thūpañ ca mahañ ca akaṃsu| kāpilavatthavā pi sakyā kapilavatthusmiṃ bhagavato sarīrānaṃ thūpañ ca mahañ ca akaṃsu| allakappakā pi bulayo allakappe bhagavato sarīrānaṃ thūpañ ca mahañ ca akaṃsu| rāmagāmakā pi koliyā rāmagāme bhagavato sarīrānaṃ thūpañ ca mahañ ca akaṃsu| veṭhadīpako pi brāhmaṇo veṭhadīpe bhagavato sarīrānaṃ thūpañ ca mahañ ca akāsi| pāveyyakā pi mallā pāvāyaṃ bhagavato sarīrānaṃ thūpañ ca mahañ ca akaṃsu| kosinārakā pi mallā kusinārāyaṃ bhagavato sarīrānaṃ thūpañ ca mahañ ca akaṃsu| doṇo pi brāhmaṇo kumbhassa thūpañ ca mahañ ca akāsi| pipphalivaniyā pi moriyā pipphalivane aṅgārānaṃ thūpañ ca mahañ ca akaṃsu| iti aṭṭh' assa sarīra-thūpā navamo kumbha-thūpo dasamo aṅgāra-thūpo| evam etaṃ bhūta-pubban ti|
28) aṭṭha-doṇaṃ cakkhumato sarīraṃ satta-doṇaṃ jambu-dīpe mahenti, ekañ ca doṇaṃ purisa-varuttamassa rāmagāme nāga-rājā mahenti| ekā pi dāṭhā tidivehi pūjitā, ekā pana gandhāra-pure mahīyati, kāliṅga-rañño vijite pun' ekaṃ ekaṃ puna nāga-rājā mahenti| tass' eva tejena ayaṃ vasundharā āyāga-seṭṭhehi mahī alaṃkatā| evam imaṃ cakkhumato sarīraṃ susakkataṃ sakkata-sakkatehi| devinda-nāginda-narinda-pūjito manussa-seṭṭhehi tath' eva pūjito taṃ vandatha pañjalikā bhavitvā buddho have kappa-satehi dullabho ti|mahā-parinibbāna-suttantaṃ niṭṭhitaṃ|
| Previous |